POR QUE NOS QUEDAMOS CO ZOO DE SANTILLANA

POR QUE NOS QUEDAMOS CO ZOO DE SANTILLANA

Folleto promocional do Zoo de Santillana que nos entregaron nunha das últimas visitas que fixemos.

Ao longo da nosa vida visitamos moreas de parques zoolóxicos, moito máis cando iamos cos nosos fillos. Dos grandes salientaríamos o de Barcelona e, nomeadamente, o de Lisboa. Aos dous achegámonos un bo feixe de veces. Cabárceno [en Cantabria], que tamén visitamos, é outra cousa, e xa se encarga o mediático presidente Miguel Ángel Revilla de vulgarizalo. Porén, desta volta queremos poñer en valor o Zoo de Santillana del Mar [como di o tópico, non é santa, nin plana, nin ten mar]. Moitas veces fixemos “parada e fonda” en Santillana [Cantabria] dende a década dos 80. Algunhas coincidindo co regreso das viaxes por Europa en coche. Outrosí con excursións escolares, porque o Zoo de Santillana está moi ben planificado pra discentes. Pequeno, pero moi aqueloutrado. Non imos falar que leva operativo dende 1977, que se achega aos 4 millóns de visitantes, que acubilla máis de 2 mil animais, mesmo que ten un parque do Cuaternario [ao seu carón está Altamira], acuario, terrario, aviario, casiñas de primates… Salientariamos o Xardín das bolboretas e os programas de alimentación, nomeadamente das serpes con explicación didáctica. Mesmo que o seu propietario é o inquedo José Ignacio Pardo de Santayana, que tantas veces temos escoitado en Radio-5 [Todo Noticias], chupando asfalto no Citroën de turno [Dyane-6, 2CV, AX, BX, C-4 e C-5, todos vermellos agás o 2CV que era amarelo]. Por mor de razóns familiares acesas, volvemos visitar o Zoolóxico e Parque Cuaternario de Santillana del Mar, moitas veces dende o 2008. Un singular zoo que resiste malia os tempos de hogano. Atopamos en youtube un vídeo moi aquelado, mesmo con milleiros de visitas, e que penduramos eiquí intencionadamente. Ánimo, que agora pola Transcantábrica non se fai tan pesada a viaxe polo Norte… Beizón!

https://www.youtube.com/watch?v=vtfiMDNtdsg

Comentarios pechados.