En www.ivoox.com atopamos un singular documento sonoro de Francisco Carballo; unha intensa entrevista radiofónica [e telefónica, pois el estaba fisicamente en Chan do Monte, Marín “no seu despacho”]. Fixéranlla en decembro de 2004 dende Radio Allariz. Baixo o título A doma de Galiza nos Séculos Escuros  [durante 23 minutos e 44 segundos], Francisco Carballo amosa empatía, gran capacidade de comunicación, mesmo enorme erudición e maxisterio.

Fala dos Irmandiños e o desexo dunha maioría dos galegos “para conseguir unha situación menos desfavorábel diante do alto clero e da alta nobreza”, unha reflexión sobre a Galiza de entreséculos [XV-XVI] co mercantilismo como pano de fondo, da lenta desaparición do sistema feudal eiquí. Outrosí da monarquía absoluta, do Noso Reino que se somete con moita subordinación a Castela [económica, social e culturalmente]. Da Igrexa medieval e da moderna: da decapitación da monacal e da reconversión episcopal con bispos alleos que adoptan o castelán tratándonos como unha colonia. Tamén dos Séculos Escuros, do nauta macedán João da Nova, de Feijoo, de Sarmiento, da Xunta de Galiza [que non ten nada que ver coa actual], do despotismo ilustrado, dos provincialistas e, para rematar, da Igrexa de hogano. Mesmo conclúe dicindo [con fortes verbas] que o bispo de Ourense, monseñor Temiño Sainz, fora “un prelado militarista, falanxista, colonial, franquista e fascista, oposto a todo o que tivese que ver coa inculturación da Igrexa galega e coa novas correntes arredor do Vaticano II”.

Na web referenciada fan unha entradiña: “Entrevista a Francisco Carballo en Radio Allariz no 2004. Francisco Carballo estudou Teoloxía e Historia (licenciado en 1954) en Madrid. En 1973 trasladouse Vigo como profesor da Escola Universitaria de Maxisterio. Especializado na Idade Moderna galega (ss. XVI-XVIII), así como no destacado papel que tivo a Igrexa na Historia da Galiza. Francisco Carballo foi un dos fundadores do semanario A Nosa Terra en 1977, e un colaborador constante. Ten colaboracións en A Trabe de Ouro e tamén en Encrucillada. Actualmente vive no Morrazo desde que se xubilou”.

Invitamos a tod@s os que nos siguen, escoiten a rexa voz de Francisco Carballo neste interesantísimo documento que incorporamos á bitácora. Eis o enlace ao documento [pinchar eiquí].

N.B.- Ilustramos desta volta a achega cunha iconográfica foto de Xan Carballa que xa temos pendurado outras veces. Nela podemos ver a Francisco Carballo na Praza de Galicia en Santiago de Compostela, o 25 de xullo de 1981, no acto central do Día da Patria Galega, no que foi o mantedor e primeiro orador [en verbas do escritor e xornalista Afonso Eiré, F. Carballo foi o mellor comunicador galego dende os tempos da II República].