Nos anos 90 do século pasado comezamos un delongado traballo de campo pra mergullarnos no universo dos Felos de Maceda. En 1995 imprentamos dúas páxinas completas no xornal La Región [domingo de Entroido, 26 de febreiro], baseado no díptico que tivera a ben publicarnos naquela altura o Concello de Maceda. Até daquela os Felos non existían a nivel mediático. Outrosí conseguimos un programa monográfico [media hora de entrevista] en Radio Nacional de España en Galicia [ao mediodía daquel domingo, 26 de febreiro]. Tamén un tempo salientábel do programa “O Semanal” da Televisión de Galicia [arredor de once minutos] que se emitiu o sábado do Entroido, o 25 de febreiro ás dez da noite, en horario de máxima audiencia co título “De Maceda ao Entroido”.

Dúas décadas despois, o insansábel activista cultural de Maceda, José Juan Pérez Ramos, co gallo da feliz idea dunha bitácora dedicada monograficamente á máscara tradicional do Noso Entroido [felosdemaceda.com], pediunos se lle deixabamos a gravación daquel programa que nós tiñamos en VHS. Pasouna a formato dixital e pendurouna na arañeira. É certo o que di na entradiña, pois era a primeira vez que os Felos tiñan “cancha” naquel medio. O guión da reportaxe estaba baseado no traballo que lle remesaramos nós e que en parte coincidía co publicado en La Región [matizar que a nosa xente vístese de Felo, non se disfraza]. Paga a pena visualizar esta pioneira reportaxe pra mergullarnos de vez [e por vez primeira na televisión] no universo Felo, ao que lle iremos metendo o dente con outras fasquías en chegando. Beizón!