Pásanos Xan Carballa un par de fotos (e o díptico) dun acto que se celebrara na Galería Sargadelos, co gallo do cincuentenario da primeira edición do Sempre en Galiza de Castelao. Fora organizado pola Cultural de Vigo que presidía Francisco Carballo naquela altura. Formaba parte dun ciclo de conferencias da Federación de Asociacións Culturais Galegas.

Participaran: A. C. Alexandre Bóveda da Coruña, A. C. Francisco Lanza de Ribadeo, A. C. Auriense de Ourense, A. C. Sementeira de Viveiro, A. C. Castelao de Monforte, A Cultural de Vigo, A. C. Avantar do Carballiño e A. C. Xermolos de Guitiriz.

Entre os ponentes estaban, ademais de Francisco Carballo, Bautista Álvarez, X. R. Barreiro Fernández, X. L. Barreiro Rivas, X. M. Beiras Torrado, Xan Carballa, Isaac Díaz Pardo, Lois Diéguez, Manuel María, Pilar García Negro, Eduardo Gutiérrez Fernández, Manuel López Foxo, Francisco Rodríguez e Marcos Valcárcel.

O ciclo de conferencias desenvolvérase entre o 18 de novembro e o 17 de decembro de 1994. O acto de Vigo, no que interviran Francisco Carballo, Xan Carballa e Manuel López Foxo, fora adiante o 22 de novembro. Naquela mesa redonda falaran da vixencia daquela publicación. Dez anos antes, en 1984, Francisco Carballo participara nun libro colectivo titulado Castelao, contra a manipulación, que editara Xistral, da man de Manuel María, no que falaban da “invocación abusiva do nome de Castelao, que ameazaba con disimular o significado da súa obra”.